58ኛው የተባበሩት መንግስታት የዓለም ቱሪዝም ድርጅት የአፍሪካ ኮሚሽን(CAF) ስብሰባ በአቢጃን ተካሄደ ፣

News

የተባበሩት መንግስታት የዓለም ቱሪዝም ድርጅት የአፍሪካ ኮሚሽን 58ኛው ስብሰባ እንዲሁም የአስር ዓመት የዘላቂ ቱሪዝም ልማት ጉባኤና ዓውደ ጥናት ( Meeting of the UNWTO-Commission for Africa-CAF and the 10 Year Framework of Programmes-YFP Sustainable Tourism Conference & Symposium on Accelerating the Shift towards Sustainable Consumption and Production Patterns ) በሚል ርዕስ    በምዕራባዊቷ አፍሪካ ኮትዲቯር ዋና ከተማ በሆነችው በአቢጃን እ.ኤ.አ ከኤፕሪል            19-21/2016 ተካሂዷል፡፡

በዚህ ስብሰባ ላይ በሚኒስቴር መ/ቤታችን የቱሪዝም ልማት ዘርፍ ሚኒስትር ዴኤታ በክብርት ወ/ሮ ታደለች ዳለቾ የሚመራ አራት አባላት ያሉት የኢትዮጵያ የልዑካን ቡድን በመሳተፍ የተመለሰ ሲሆን በዝግጅቱ ከአፍሪካ አስራ ስምንት የቱሪዝም ሚኒስትሮች፣ አገራትን ወክለው የመጡ በርካታ የሥራ ሀላፊዎች እና 2ዐዐ የሚደርሱ ሌሎች ጥሪ የተደረገላቸው ተሳታፊዎች ተገኝተዋል፡፡

በስብሰባው ላይ በርካታ ጉዳዮች ላይ ምክክር የተካሄደ ሲሆን በዋነኛነትም በሚከተሉት ርዕሰ-ጉዳዮች ላይ ሚኒስትሮች ውይይት አድርገው ለአፈጻጸም የሚረዳ አቅጣጫ አስቀምጠዋል፡፡

1.በቱሪዝም ሴክተር እንቅስቃሴ ውስጥ ባለፈው መስከረም ወር በተባበሩት መንግስታት የፀደቀውን የ2030 ዘላቂ የልማት ግቦች (Sustainable Development Goals-SDG) ዘርፉን ትራንስፎርም ለማድረግ፣ ሀገራት ኢኮኖሚያዊ ዕድገት፣ ዘላቂ ፍጆታና ምርትን ለማፋጠን በልማት ግቦቹ ውስጥ ስለሚያካትቱበት ሁኔታ (Enhancing Inclusive Economic Growth and Accelerating Sustainable consumption Pattern – 10 YEP STP in Tourism Sector)

2.ዘላቂ የልማት ግቦች በስኬት ተግባራዊ ለማድረግ የቱሪዝም ኢንቨስትመንትን ለማስፋፋት፣ የፋይናንስ አቅምን ለማሳደግ እንዲሁም የቴክኖሎጂ አጠቃቀም የመሰረተ ልማት አውታር ዝርጋታና የሰው ሀይል ልማትን ትግበራን የሚያፋጥኑ የፖሊሲ ማዕቀፎችን የማውጣትና ግንዛቤን የማዳበር ሥራዎች ስለሚከናወኑበት ሁኔታ የአንዳንድ ሀገራንትን ተሞክሮ ባገናዘበ መልኩ የፓናል ውይይት ተካሄዷል፡፡ ከዚህም በተጨማሪ የፋይናንስ አቅምን ለማሳደግ ዓለም አቀፍ፣ አህጉር አቀፍና ብሔራዊ የፋይናንስ ተቋማት በትብብር በአጋርነት መስራት እንደሚገባቸው በውይይቱ ላይ ተመላክቷል፡፡
 

3.በቱሪዝም ሴክተር ባለድርሻ አካላት መሀከል ሊኖር ስለሚገባው ትብብርና አጋርነት በተለይም ከግል ዘርፍና ከማህበረሰቡ ጋር በትስስርና ተቀናጅቶ በመስራት የቱሪዝም ኢንዱስትሪውን አፈፃፀም በማሻሻል ዘርፈ-ብዙ የጋራ ተጠቃሚነት ማሳደግ ስለሚቻልበት ሁኔታ የፓናል ውይይት ተካሄዶል፡፡
ስብሰባው ከመጀመሩ ቀደም ብሎ የስብሰባው ተሳታፊዎች እ.ኤ.አ ማርች 13/2016 አቢጃን ከተማ የአትላንቲክ ውቅያኖስ ዳርቻ ግራንድ ባሳም በተባለ ስፍራ በአሸባሪዎች ጥቃት የደረሰበትን ሆቴል ጉብኝት ያደረጉ ሲሆን የተባበሩት መንግስታት የዓለም ቱሪዝም ድርጅት (UNWTO) ዋና ፀሐፊ ዶ/ር ታሌብ ራፋይ በድርጅቱና በአባል አገራት ስም በጥቃቱ ሕይወታቸው ላለፈ ሰዎች የአበባ ጉንጉን አስቀምጠዋል፡፡ በቦታው በደረሰው የአሸባሪዎች ጥቃት በወቅቱ በሆቴሉ ይስተናገዱ የነበሩ ሰላሳ የሚደርሱ ቱሪስቶችና የሆቴሉ ሰራተኞች የተገደሉ ሲሆን ሌሎች አርባ በሚሆኑ ሰዎች ላይ የአካል ጉዳት መፈፀሙ ይታወሳል፡፡

በተያያዘ ዜና ክብርት ሚኒስትር ዴኤታ ወ/ሮ ታደለች ዳለቾ በስብሰባው ላይ ለመሳተፍ ከመጡ የተለያዩ ሀገራት ሚኒስትሮች ጋር   በሁለትዮሽ እና አህጉር አቀፍ የቱሪዝም ጉዳዮች ላይ ውይይት ያካሄዱ ሲሆን በተለይም በጉባኤ አስተናጋጅ ሀገር በኮትዲzEር፣ ከደቡብ አፍሪ ከዚምባብዌ የቱሪዝም ሚኒስትሮች ጋር ከየሀገሪቱ ጋር በትብብር ለመስራት በሚቻልበት ሁኔታ ላይ የሀሳብ ልውውጥ አድርገዋል፡፡ ክብርት ወ/ሮ ታደለች ዳለቾ ኢትዮጵያ ቀጣዩን ማለትም 59ኛውን የተባበሩት መንግስታት የዓለም ቱሪዝም ድርጅት የአፍሪካ ኮሚሽን ጉባኤን ለማስተናገድ ፍላጎት ያላት መሆኑን በመግለጽ ያቀረቡትን ጥያቄ የጉባኤው ተሳታፊዎች በመቀበል በአንድ ድምጽ በይፋ ያፀደቁ ሲሆን ዝግጅቱ እ.ኤ.አ በኤፕሪል 2017 በአዲስ አበባ እንደሚካሄድ ታውቋል፡፡

ክብርት ሚኒስትር ዴኤታ በዚህ መድረክ ባደረጉት ንግግር በሀገሪቱ ግራንድ ባሰም በአሸባሪዎች በተፈጸመው ጥቃት ለተገደሉትና ጉዳት ለደረሰባቸው ሰዎች እንዲሁም ለኮት ዲቯር መንግስትና ህዝብ በኢትዮጵያ መንግስትና በራሳቸው ስም የተሰማቸውን ሀዘን ገልጸዋል፡፡

በተጨማሪም ክብርት ሚኒስትር ዴኤታ ከዚህ ቀደም ሚኒስቴሩ መ/ቤታችን ከድርጅቱ (UNWTO) ጋር የመግባቢያ ሰነድ በመፈራረም በጋራ ለመስራት ስምምነት ከተደረሰባቸው ተግባራት መሀከል  የሆቴሎች የደረጃ ምደባ ስርዓት ዘላቂነት እንዲኖረው የአቅም ግንባታ ስልጠና በመስጠት ሂደቱን ለማስቀጠል እንዲሁም የቱሪዝም መረጃ አያያዝና ስታትስቲክስ ዓለም አቀፍ አሰራርን (Tourism Satellite Account - TSA) ተፈጻሚ ለማድረግ የሚያስችል የሥልጠና ፕሮግራም ማመቻቸት ስለሚቻልበት ሁኔታ ከድርጅቱ የሥራ ሀላፊዎች ጋር በመነጋገር ስምምነት ላይ ተደርሷል፡፡ ከዚሁ ጋር በተያያዘ የድርጅቱ የአፍሪካ ኮሚሽን (CAF) በመጪው መስከረም 2009 ዓ.ም በቱሪስት መዳረሻ ልማት ለአባል ሀገራት ያዘጋጀው ዓለም አቀፍ ስልጠና ፕሮግራም በአዲስ አበባ እንደሚካሄድ ለማወቅ ተችሏል፡፡

በኮት ዲቯር የሚገኘው የኢትዮጵያ ኤምባሲ በስብሰባው ላይ ተሳታፊ ከመሆኑም በተጨማሪ የልዑካን ቡድኑ የአቢጃን ጉዞና ቆይታው የተሳካ እንዲሆን በማድረጉ ረገድ ከፍተኛ ድጋፍና ትብብር አድርጓል፡፡


News and Updates News and Updates

— 10 Items per Page
Showing 1 - 10 of 13 results.