የተባበሩት መንግስታት ድርጅት የትምህርት የሳይንስና የባህል ድርጅት(UNESCO) ላለፉት 21 አመታት  በአደጋ መዝገብ ውስጥ የቆየውን የሰሜን ተራሮች ብሄራዊ ፓርክ የአለም ቅርስ ኮሚቴ በፖላንድ ክራኮው ባደረገው ስብሰባ አደጋ ውስጥ ከሚገኙ የአለም ቅርሶች ዝርዝር ውስጥ እንዲወጣ ተወሰነ፡፡

የሰሜን ተራሮች ብሄራዊ ፓርክ እ.ኤ.አ ከ1978 በዩኔስኮ የአለም ቅርስነት የተመዘገበ ሲሆን የዩኔስኮ ገምጋሚ ቡድን እ.ኤ.አ በ1995 ፓርኩ ያለበትን ሁኔታ ለዩኔስኮ ሪፖርት በማቅረብ እ.ኤ.አ በ1996 በተካሄደው በ20ኛው የዩኔስኮ መደበኛ ስብሰባ  ፓርኩ ያለበትን አደገኛ ሁኔታ በመመልከት በአደጋ መዝገብ ውስጥ እንዲገባ መወሰኑ ይታወሳል፡፡

ብሄራዊ ፓርኩ በአደጋ መዝገብ ውስጥ እንዲገባ ምክነያት ከሆኑት ጉዳዮች መካከል በፓርኩ ክልል ውስጥ የሰዎች ሰፈራ መስፋፋት፤ ልቅ እርሻና ቅጦሽ፤በፓርኩ ውስጥ የሚያልፍ መንገድ መኖር፤ እንዲሁም ከጊዜ ወደ ጊዜ የፓርኩ ወሰን ክልል እየጠበበ መምጣት መሆናቸው ይታወቃል፡፡ በዚህም ምክነያት በፓርኩ ውስጥ የሚገኙት የዱር እንስሳት ቁጥር በተለይም የዋልያና ቀይ ቀበሮ ቁጥር በከፍተኛ መጠን መመናመን ለችግሩ ዋና ዋና  ምክነያት ሆነው ቆይተዋል፡፡

ይሁን እንጅ ችግሩን ለመፍታት የፌደራል መንግስትና የአማራ ብሄራዊ ክልላዊ መንግስት ባደረጉት  ርብርብ ፓርኩ ከአደጋ መዝገብ ውስጥ እንዲወጣ ከፍተኛ ጥረት አድርገዋል፡፡ በዚህም የፌደራል መንግስት በፓርኩ ውስጥ የሚኖሩ ህብረትሰብ ክፍሎችን ለማስወጣት የ 158 ሚሊዮን ብር ካሳ ክፍያ ከመሸፈኑም ባሻገር የአማራ ብሄራዊ  ክልላዊ መንግስት ለተነሽዎች ምትክ ቦታ በማዘጋጀት 40 ሚሊዮን ብር የሚገመት የከተማ ቦታ በመስጠትና ተነሽዎች ንብረታቸውን እንዲያጓጉዙ ከግማሽ ሚሊዮን ብር በላይ ድጋፍ በማድረግ ስራው ስኬታማ እንዲሆን አድርገዋል፡፤

ዩኔስኮ በአለም ቅርሶች የአደጋ መዝገብ  ዝርዝር ውጥ ያሉትን ሀገራት በአለም አቀፍ ቅርስነት ያስመዘገቧቸው ቅርሶች አደጋ እንደተጋረጠባቸው በማወቅ አፋጣኝ መፍትሄ እንዲሰጡ ያደርጋል። ከዚህ አኳያ የICUN የተልዕኮ ቡድን ወደ ሀገራችን በመምጣት ባለፈው ወር ባደረገው ግምገማ መነሻ ሪፖርቱን ለዩኔስኮ በማቅረቡ እ.አ.አ ጁላይ 4/2017 በፖላንድ በተካሄደው የአለም ቅርስ ኮሚቴ  መደበኛ ጉባየ  ላይ ጉዳዩ ሰፊ ውይይትና ክርክር ከተደረገበት በኋላ  ፓርኩ ከዩኔስኮ የአደጋ መዝገብ እንዲወጣ ኮሚቴው  ወስኗል

በፓርኩ ውስጥ የሚገኙ እንደ ዋልያ እና ጭላዳ ዝንጀሮ ያሉ ብርቅዬ እንሰሳትን ጠብቆ በማቆየት ረገድም የሚደነቅ ስራ መሰራቱን ኮሚቴው ገልጿል።