የጂኦ ስፓሻል መረጃን ለቱሪዝም አገልግሎት ማዋል የሚቻልበት ሁኔታ ውይይት ተካሄደ፤

 

ጥቅምት 21/2010 ዓ.ም እያደገ ከመጣው የቱሪዝም ዘርፍ ጋር አብሮ ለመጓዝና በዘርፉ የታቀዱ የልማት ግቦችን ለማሳካት ወቅቱ በሚጠይቀው የኢንፎርሜሽን ቴክኖሎጂ መጠቀም የሚያሥችል የግንዛቤ መፍጠሪያ ውይይት በባህልና ቱሪዝም ሚኒስቴር የመሰብሰቢያ አዳራሽ ከሚኒስቴር መ/ቤቱ እና ከተጠሪ ተቋማት የተውጣጡ ባለሙያዎችና ሃላፊዎች በተገኙበት ተካሄደ፡፡

የግንዛቤ ማስጨበጫውን የሰጡት ከመረጃ መረብ ደህንነት ኤጀንሲ /INSA/ በመጡ የጂኦ ስፓሻል ባለሙያዎች ሲሆኑ አጠቃላይ ተቋሙ እያከናወነ ስለሚገኝባቸው የስራ እንቅስቃሴ ገለፃ አድርገው ከባህልና ቱሪዝም ዘርፍ አንፃር ጂኦስፓሻል ምርቶችና አገልግሎቶች ለቱሪዝም ያላቸውን ፋይዳ በዋና ዋና ጉዳዮች ላይ ትኩረት በማድረግ ገለጻ አድርገዋል፡፡

የመጀመሪያው ታሪካዊ ቅርሶችን በ3ዲ በማንሳት ሞዴል በማድረግ በዘመናት ሂደት ውስጥ ቅርሶቹ ቢያረጁና ተፈጥሯዊና ሰው ሰራሽ በሆነ ሁኔታ ይዘታቸውን ቢለቁ የቀድሞ ማንነታቸውን በጠበቀ መልኩ ለመጠገን የሚያስችል፣ የመስህብ ስፍራዎችና ማዕከል ያደረገ የቱሪስት ካርታ ለማዘጋጀትና የመስህብ ቦታዎችን በምስለ ገፅታ በመያዝ ለጎብኝዎች ግልፅ የሆኑ መረጃዎችን ለመስጠት፣ የመስህብ ስፍራዎችን የይዞታ ካርታ ለማዘጋጀት፣ አዳዲስ የመስህብ ስፍራዎችን ለመለየትና የአካባቢውን የቱሪዝም አቅም በይበልጥ ለመጠቀም የሚያስፈልጉ የመሰረተ ልማት ስራዎችን ለማሟላት እንዲሁም የዱር እንስሳት ቆጠራን ማከናወን እንደሚያስችል በምስል በማስደገፍ አስረድተዋል፡፡

ተሳታፊዎችም በተነሱ ጉዳዮች ላይ ሃሳብና አስተያየታቸውን የሰጡ ሲሆን በተለይ የባህልና ቱሪዝም ዘርፍ ሁለንተናዊ የሆነ የሀገሪቱን ባህል፣ የቱሪዝም፣ የቅርስና የተፈጥሮ ሀብቶችን ለማልማትና በዘርፉ የሚስተዋሉ ችግሮችን በመለየት የመፍትሄ አቅጣጫ ለማስቀመጥ ፋይዳው የጎላ በመሆኑ ከተቋሙ ጋር በቀጣይ ተቀናጅቶ መስራ በሚቻልበት ሁኔታ ላይ ተስማምተዋል፡፡