የሚኒስተሯ መልዕክት የሚኒስተሯ መልዕክት

ከሁሉ አስቀድሜ አገራችንን ለምትጎበኙና በባህልና ቱሪዝም ዘርፍ  መዋዕለ ንዋያችሁን በማሰባሰብ ኢንቨስት ለምታደርጉ ሁሉ ከልብ የመነጨ ላቅ ያለ ምስጋናዬን ላቀርብ እወዳለሁ፡፡ ይህ ድረ-ገጽ የሚጠበቀውንና የምትፈልጉትን መረጃዎች ይሰጣል ብዬ ተስፋ እናደርጋለን፡፡

ኢትዮጵያ በተፈጥሮ፣በባህልና ታሪክ ሀብቶቿ ዘመን የማይሽራቸው አንድነትን የፈጠረች፣ የተለያዩ ብሔሮች፣ብሔረሰቦችና ሕዝቦች የራሳቸው የሆነ ቋንቋ፣ እምነት፣ ወግ እና ስርዓት አቅፋ የያዘች ሕብረ-ብሔራዊት ሀገር ናት፡፡ በተባበሩት መንግስታት የትምህርት፣ የሳይንስና የባህል ድርጅት (ዩኔስኮ) በዓለምቅርሶች መዝገብ ከተመዘገቡ ዘጠኝ የማይቀሳቀሱ ቅርሶች አንዱ በሆነው የሰሜን ተራሮች ብሔራዊ ፓርክ ውስጥ ከሚከኘው ከራስ ዳሸን ተራራ ከፍታ አስከ ዳሎል ዲፕሬሽን ዝቅታ ድረስ  በአስደናቂ መልክዓ ምድራዊ አቀማመጥ እና የአየር ንብረት፣ የብርቅዬ የዱር እንስሳት መገኛ፣ የራሷ የዘመን አቆጣጠርናፊደል፣ የሚዳሰሱና የማይዳሰሱ ቅርሶች ባለቤት በመሆኑዋ  ኢትዮጵያ በእርግጠኝነት በአስገራሚ የቱሪዝም ሀብቶች መገኛ ምድር አድርጓታል፡፡

የቅድመ ሰው ዘር መገኛና የሰው ልጅ ለመጀመሪያ ጊዜ በእግሩ መራመድ የቻለባት ሀገር ናት፡፡ የእኛ ቅድመ አያት የሆነችው የ3.2 ሚሊዮን ዓመት እድሜ ባለቤት የድንቅነሽ (ሉሲ)፣ የአርዲ የ4.4 ሚሊዮን ዓመት እና ሰላም 3.3 ሚሊዮን ዓመት እድሜ ያስቆጠሩ የቅድመ ሰው ዘር  የቅድመ ታሪክ ቅርሶች ባለቤት ናት፡፡ በዚህምኢትዮጵያ የሁላችን ቅድመ አያቶች መገኛ ወብ ምድር ናት ማለት እንችላለን፡፡  ስለሆነም ሁሉም ዜጋ ወደ ኢትዮጵያ በመምጣት የቅድመ አያቶቹን አሻራ እንዲጎበኝ ተጋብዟል፡፡

በታሪክም አንጻር  ኢትዮጵያን ወደ ኋላ መለስ ብለን ስንመለከት የ3000 ዘመን ታሪክ ያላት መሆኑዋን ያስገነዝበናል፡፡ ከታላቋ አክሱም  የነገስታት ሥርወ-መንግስታት ዘመን ጀመሮ የጥንታዊ ስልጣኔዋ መነሻ እንደሆነ የታሪክ ድርሳናት ይናገራሉ፡፡ ለአብነት በአክሱም ከተማ የሚገኙ የነገሥታት የመቃብርሥፍራዎችና ሐውልቶች  ሕያው ተምሳሌቶች ናቸው፡፡በመቀጠል በመካከለኛው ክፍለ ዘመን ከሐይማኖታዊ ሥልጣኔዎች መስፋፋት ጋር ተያይዞ በላሊበላ ታላላቅ ውቅር አብያተክርስቲያናት መታነፃቸው በተለይም ከመሬት በላይ ካለ አለት ወደ ታች ተፈልፍለው ታነፀው የወጡ የምድር ውስጥ ሕንፃዎችየደመቁበት ነው፤ ይህም ለእምነቱ መታሳቢያነት ብቻ  ሳይሆን የሕንፃ ጥበብን ያሳየ ነው፡፡የአንድ ሺህ ዓመታት በላይ  ዕድሜን ያስቆጠረው  የሐረር ጀጎል ግንብ ኢትዮጵያን ከጥንታዊ እስላማዊ ከተሞች አንዱ ሲያደርጋት፣ በ17ኛው መቶ ክፍለ ዘመን አካባቢ የታነፀውና በኢትዮጵያ  የጥንታዊ  ከተሞች ታሪክናዕድገት ፈር ቀዳጅ የጎንደር ነገሥታት ግብረ ህንፃተመሳሳይ ታሪክን የሚዘክር ነው፡፡ሌላው የኮንሶ ባህላዊ መልካምድርና የአፈር እቀባ፤ የእርሻ አስተራረስ ዘዴ፣ እንዲሁም በአገሪቱ መካከለኛ ከፍል የሚገኘው የጢያ ትክል ድንጋዮች፣ የታችኛው ኦሞ እና የመካከለኛ አዋሽ ፓሊዮአንትሮፖሎጂካል ሥፍራዎች፣በተባበሩት መንግስታት የትምህርት፣ የሳይንስና የባህል ድርጅት (ዩኔስኮ) የተመዘገቡ 12 የባህላዊ፣ ታሪካዊ ተፈጥሯዊ ቅርሶች፣  12 የሥነ ጽሑፍ ሀብቶች እና 4  ጥበቃ ብዝሃሕይወት  ቦታዎች ሕያው ምስክሮች ናቸው፡፡

ኢትዮጵያ ከአፍሪካ በተነፃፃሪነት ቁጥራቸው በርከት ያሉ ብሔራዊ ፓርኮች ያላት በመሆኑ መጎብኝት ለሚፈልጉ ቱሪስቶች ደስታን የሚፈጥሩ ጥብቅ ብዝሃሕይወት እና የዱር እንስሳት መኖሪያ ቦታዎች እንደየሥነ-ምህዳር ቀጠናቸው በያሉበት ለማየት ብሎም ለጉዞና አድቬንቸር ቱሪዝም  መልካም አጋጣሚን የፈጥሩናቸው፡፡ 

ኢትዮጵያ ብዝሃነትን የተቀበለችና ከ80 በላይ ብሔሮች፣ብሔረሰቦች ሕዝቦች ሀገር ናት፡፡ ሕዝቦቿም የየራሳቸው የሆነ ማንነት የሚገለጽበት ባህል፣ ታሪክ፣  ቋንቋ፣ ስነ-ቃል፣ ወግ፣ ዕምነቶች፣ ዕሴቶችና ሥነ-ጥበብ  ሀብቶች አሏቸው፡፡በዚህ ብዝሃነት ውስጥ ባንድነት በመቻቻልና በመከባበር በስላም የሚኖሩ ፤ በአንፃሩም ለእንግዶቻችንና ቱሪስቶቻችን አቀባበል ልምድ በሕዝቦቻችን መካከል ሲወርድሲዋረድ የመጣ ድንቅና ውብ የእንግዳ ተቀባይነት ባህል አለን፡፡

በመጨረሻም ውድ አንባቢያን  እነዚህን የኋላ ታሪኳቹዋን ለመናገር በመብቃቴ ላቅ ያለ ኩራት ይሰማኛል፡፡ኢትዮጵያ ገና ብዙ ያልተነኩ የባህልና ቱሪዝም ሀብቶች ያሏት በመሆኑ ለማየት ዕድሉ ያልገጠማችሁ በውጭ አገር የምትኖሩ ዜጎቻችን ወደ ኢትዮጵያ በመምጣት ጎብኙዋት፡፡ መዋዕለ ንዋያችሁንምበማሰባሰብ ኢንቨስት እንድታደርጉ በታላቅ አክብሮት ጋብዤያችኋለሁ፡፡ 

ስለሆነም የሁላችንም መገኛ የሆነችዋ ኢትዮጵያ  የደመቀችና የለመለመች ምድር እንድትሆነን ሀብቶቻችን በጋራ በማልማትና በመጠበቅ ኢኮኖሚያዊ የጋራ ተጠቃሚነትን እናስፍን እንላለሁ፡፡!!

በብዙ ማይልስ ርቀት ላይ ያላችሁ ሁሉ የምትፈልጉትን ድጋፍ፣ ተጨማሪ ማበረታቻዎች እና ሰፊ ሽፋን ያለው አገልግሎት ማግኘት የምትችሉበትን ሁኔታ የማመቻቸት ኃላፊነት ለሚኒስቴር መስሪያ ቤታችን የተሰጠው ተግባር መሆኑን መግለጽ እወዳለሁ፡፡

"ወደዚህች ብዝሃነትን በምታስተደናግደዋ ምድረ ቀደምት፣ የሰው ዘር መገኛ፣ የቡና መገኛ፣ ከአፍሪካ የራሷ ፊደል ያላትና የአፍሪካ  ህብረት መዲና አዲስ አበባ፣ ኢትዮጵያ እንኳን ደህና መጣችሁ፡፡"

ክብርት ወ/ሮ ፎዚያ አሚን
የኢ.ፌ.ዲ.ሪ ባህልና ቱሪዝም ሚኒስትር