ቤተ መንግሥቱ በውሃ የሚሰራ አነስተኛ ኤሌክትሪክ ሀይል ማመንጫ የነበረው ሲሆን በዙርያውም ሰባት አይነት የውሃ አይነቶች ይገኙበታል። ከእነዚህ ውስጥ ፍል ውሃ እና ጥቁር ውሃ/የሚረጋ ውሃ/ ይገኙበታል።
የኤረር ቤተ መንግስት ልዩ ስጦታ የሆነው ፍል ውሃ በሀገራችን ካሉ ፍል ውሃዎች የሚለይበት ለሁሉም የሰውነት ክፍሎች ማለትም ከአንገት በላይ/እስቲም/፣ከጉልበት በታች፣ከወገብ በታች እንዲሁም ሙሉ የሰውነት ክፍል የሚታጠቡበት ለየብቻ አገልግሎት የሚሰጡ ክፍሎች ያሉት በመሆኑ ነው። በአሁኑ ጊዜ ፍል ውሃው በጥሩ ሁኔታ በነፃ አገልግሎት እየሰጠ ይገኛል። ፍል ውሃውን የአከባቢው ማህበረሰብ እና ከተለያዩ የሀገሪቱ ክፍሎች የመጡ ለመድሀኒትነት ይጠቀሙበታል።

የኤረር ቤተ መንግስት በ2008 ዓ.ም በ4 ሚሊዮን ብር እድሳት ቢደረግለትም ቅርሱን የማስተዋወቅ ስራ ስላልተሰራለት ቤተ መንግስቱን ጎብኝዎች እንደማይጎበኙት የአከባቢው ነዎሪዎች ይናገራሉ።

የክልሉ ባህልና ቱሪዝም ቢሮ ከባህልና ቱሪዝም ሚኒስቴር ጋር በመሆን በቀጣይ መስከረም ወር በክልሉ የሚከበረውን የዓለም የቱሪዝም ቀን በማስመልከት መዳረሻዎችን ከመገናኛ ብዙኅን ጋር በመጎብኘት የሚገኝ ሲሆን የኤረር ቤተ መንግስት አንዱ በመሆኑ መዳረሻው ያለበትን ችግር በመለየት ችግሮችን በመቅረፍ የማስተዋወቅ ስራ እንደሚሰራ አስታውቋል። ዘንድሮ በክልሉ የሚከበረው የዓለም የቱሪዝም ቀን ክልሉ ያሉትን የቱሪዝም ሀብቶች ለማስተዎወቅ እንደሚረዳም ተነግሯል።

የሱማሌ ክልላዊ መንግስት በርካታ የቱሪዝም መዳረሻዎቹ የሚገኙበት ክልል ሲሆን በቀጣይ መዳረሻዎቹ በተገቢው ለምተው የማስተዋወቅ ስራ ከተሰራባቸው ሱማሌ ክልል ሌላኛዎ የምስራቅ ኢትዮጵያ የቱሪዝም መዳረሻ የምትሆንበት ቀን እሩቅ አይሆንም።